الخميس، 28 مارس، 2013

تزيين البيض بطرق مختلفة

شم النسيم قرب وناس كتير اوى بتحب تلون البيض وتجيب الفسيخ بقى والرنجة
والبصل ويحلوا بقى بالآيس كريم وكل سنة وانتوا طيبين
انا عارفه ان فى ناس كتير مش بتعترف بيه كعيد وانا  منهم، هو يوم زى اى يوم
بس هو يوم اجازة وبنغير فيه جو ده لو غيرنا اصلا عادى يعنى
موضوعى بقى عن تلوين البيض بطريقه جديدة شوفتها على موقع اجنبى قولت اجيبهولك تشوفوه بالعربى 
 مش شرط طبعا يكون فى شم النسيم بس
انت لو قعدتى فى اى يوم مع اولادك وقعدتوا تزينوا البيض سوا اكيد هيبقوا فى قمة السعاده لان الولاد بتحب تشارك نشاطات ممتعه مع اهلهم وده اكيد بيقرب ما بينكم ويعزز علاقة الصداقه بين الطفل واهله
نيجى بقى للطريقه الجديده بتاعتنا فى تزيين البيض
عارفين المانيكير اللى البنات تعمله على ايديه اللى بيسموه marbled
اللى بيبقى فيه اكتر من لون متداخلين مع بعض هى دى بقى الطريقه اللى هنزين بيها البيض ، نشوف البيض وهو مزين 




الطريقه هى نفس الطريقه اللى بنحط بيها المانيكير
هتجيبى المانيكير وتنقطى منه فى وعاء واسع شوية وتكونى حاطه فيه مايه دافيه
وعد كده هتوزعى المانيكير فى الوعاء زى الصورة دى



بعد كده هتمسكى البيضة بصوبعين وتخليها بالوضع الافقى وتغطسيها فالمانيكير والمايه وتستنى ثوانى وبعدين تشيليها وتحطيها فى طبق البيض الورق وسيبيها تنشف 
   ودى النتيجه النهائيه بعد البيضه منشفت



ايه رأيكوا بقى ؟ تحفه اكيد س ااكدلك انك هتخلصى كل المانيكير اللى عندك ههههههههههه .
------------------------------------------------------------------------
الطريقة التانيه بقى
هنستخدم فيها الوان طعام ودى اكيد أأمن وكمان هنستخدم معاها معجون حلاقه 
انا مليش دعوة لو جوزك زعقلك هههههههه
شوفوا الصورة الاول   
    اول حاجه هتجيبى وعاء واسع وتفضى فيه شوية لا مش شوية ده شويات من معجون الحلاقة وتضيفى الوان الطعام ، هتحطى شوية كده من كل لون وبعد كده تقلبى المعجون بحيث يبقى فيه الالوان متداخله فى بعضها وكل لون واضح 
 بعد مقلبتى الالوان مع بعض هاتى البيضه وقلبيها من جميع النواحى فى معجون الحلاقة الملون


 بعد مخلصتى والبيضه كلها اتلونت طلعى البيضه وحطيها على اى حامل 
 سيبيها بقى ليله تنشف وتانى يوم هتبصى تلاقيها نشفت ، هاتى مناديل وامسحى المعجون الناشف ده وحاولى تنضفيها كويس
 
  وادى النتيجه
ودى شوية  صور لافكار تانيه كتير لتزيين البيض
الصورة دى معموله بالديكوباج
 
ممكن تعملى حيوانات زى الصور دى
 
 
او ممكن ترعبوا الولاد وتلونوا البيض بالطريقه دى
 
 
او تعملوا حاجات مضحكة زى كده
 
 
 
 

 او حتى تلزقوا عليهم ستيكرز زى دى
 
 
 او تلزقى الستيكرز وتلونى وبعدين تشيلي الستيكرز تانى زى كده
 
او حتى تلزقى وردات بارزة زى الصورة دى
 
 او لو انت فاضيه بقى ومش وراكى حاجه اعمليها بالخرز زى دى

او كريستالات 
 
او حتى ترتر 

كفايه كده 
اتمنى الموضوع يعجبكوا ان شاء الله

ليست هناك تعليقات:

إرسال تعليق

من فضلك اترك تعليق

ShareThis

Related Posts Plugin for WordPress, Blogger...